Aksjonerte på Indre kai

HAUGESUND: Onsdag kveld og natt til i dag blei statuar over heile Europa knebla av unge Europavenner i ulike europeiske byar. Dette blei gjort for å visa kva som skjer med opposisjonen i Kviterussland, melder Haugesund Europeisk Ungdom i ei pressemelding.

Lokallaget deltok i den europeiske aksjonen "Give Belarus a voice", der dei vil støtta opposisjonen sitt arbeid for menneskerettar og demokrati i Kviterussland.

I Haugesund batt Europeisk Ungdom munnbind over munnen til statuen av Marilyn Monroe, og dei festa på henne ein plakat med bodskapen "Europe, give the people of Belarus a voice".

Rasar over Lukasjenko

- I Noreg får valfusket i Kviterussland minimalt med merksemd. Me håpar denne nattaksjonen kan opna nordmenn sine auge for at over 10 millionar europearar lev i eit diktatur berre eit par flytimar unna, seier Sarah Stephanie Skjoldevik i Haugesund Europeisk Ungdom.

Skjoldevik rasar over Lukasjenko i Kviterussland, som ho meiner kneblar folket.

- Norske og europeiske politikarar kan ikkje godta at diktatoren Lukasejnko kastar ut studentar som driv med studentpolitikk, kneblar ytringsfridommen og hindrar reelle val, seier Sarah Stephanie Skjoldevik.

Publisert torsdag 19. mars 2009 kl. 00:00.
Sist oppdatert torsdag 19. mars 2009 kl. 10:35.