Betre enn i fjor

VIKEDAL: I Suldalslågen er laksefangstane dobla frå botnåret i fjor. Ikkje minst takk vera at dei «hjelper» smolten til havs.
Både i Etneelva og Vikedalselva gler elveeigarane seg over auka laksefangst frå i fjor. Og dei gler seg endå meir over den sterke auken i svidder (smålaks under tre kilo). Det betyr nemleg at neste år kan det ventast eit godt innsig av mellomlaks frå tre til sju kilo.

Suldalslågen

Dagleg leiar Øyvind Vårvik i Suldal elveeigarlag seier at i år var første året dei kunne få tilbake smolt som var taua ut fjorden i merd før han blei sleppt ut i havet.
– Utslepinga av 80.000 smolt frå klekkeriet i lågen i merd frå elvemunningen og ut fjorden – ut i ope farvatn, gir resultat. Me har prøvd mange andre tiltak, men dette nyttar og gjer meg optimistisk, seier Vårvik.
– Kvifor nyttar dette?
– Fordi me hjelper dei på veg ut i havet og fordi dei kan hende også slepp unna lakselus.
Største laksen i Suldalslågen i år var på 21.1 kilo. Det er mange år sidan ein så stor laks blei tatt her.

Vikedalselva

Etter ein kanonstart med mykje stor laks, roa sesongen i Vikedal seg ned til eit normalår, men vel hundre kilo meir totalt enn i fjor.
– Me gler oss serleg over at talet på fanga smålaks (svidder) mest dobla seg. Det lovar godt for mykje mellomlaks neste sesong, seier Berge Kjell Opsal i elveeigarlaget.

Etneelva

Elva i Etne hadde eit betre år i år enn i fjor. Laksefangsten auka med 954 kilo til nær 2600 kilo totalt.
– Det blei eit mellomår, men me trøystar oss med at det blei fanga serleg mykje smålaks. Derfor trur me det kjem mykje mellomlaks neste år, seier Steinar Grindheim i Etne Laks.

Rømt tamlaks

Både Etneelva og Suldalslågen er plaga med rømt oppdrettslaks. I Vikedal verkar det som om oppdrettslaksen har problem med å koma seg opp trappene ved fossen.
I Etne blei det tatt 34 oppdrettslaksar på prøvefiske tre lørdagar etter sesongslutt.
– Me har diverre også fått oppdrettslaks heilt øverst i elva. Og i dei nederste sonane blei det fanga oppdrettslaks dagleg heile sesongen. Det skumle er dessutan at dei var i alle aldrar og vektklassar (frå ein halv til ti kilo), sjøl om ingen av oppdrettsanlegga saknar fisk, seier Øyvind Vårvik.
– Kva fortel dette deg?
– Det fortel meg at her er noko som er ute av kontroll. Kvifor er det ingen som saknar tamfisken me tar i elvane våre? spør han.
sigmund.hansen@haugesunds-avis.no
Berge Kjell Opsal, elveeigar
Lovar godt: Mykje meir smålaks og brukbart med mellomlaks lovar godt for neste sesong, seier elveeigar Berge Kjell Opsal og sportsfiskar Hallgeir Brenden i Vikedalselva. Arkivfoto: Sigmund Hansen