Forpaktarane skal vekk

ETNE: Leiar i stiftingsstyret for Tesdalgarden, Audun Namtvedt, sa i eit ope møte med formannskapet mandag kveld at styret har vanskeleg for å sjå at det er grunnlag for å gå vidare med forpaktarforholdet til ekteparet Kruger på Tesdal.

– Men me ser for oss at dei får rimeleg tid, for eksempel over sommaren ein gong, med å avvikla, sa Namtvedt.

Etter at eit samrøystes formannskap gjekk inn for å halda møtet for opne dører (mange interesserte møtte opp), tok fleire representantar opp under møtet om ikkje møtet burde lukkast på grunn av sterke karakteristikkar av forpaktarparet frå stiftingsstyreleiar Namtvedt.

Men med fire mot tre røyster bestemte formannskapet at møtet skulle gå for opne dører.

Namtvedt sa dessutan at stiftinga sin advokat, Helge Talmo, alt har skreve brev til forpaktarane og vist til at dei har brote forpaktningslova og at det er grunnlag for oppseiing.

– Me ser på fleire alternativ: Å selja garden heil eller i deler, leiga han ut eller gå inn med investeringar og så leiga han ut til sterkt auka leige, sa Namtvedt.

Fleire politikarar i formannskapet sa at dei angra og at dei i dag ville ha røysta for å selja garden til private.

Kasserar i stiftingsstyret, Oddvar Åsheim, kunne informera om at Multiconsult ser ut til å kunna rå til at sauefjøset blir brukt vidare. Men at Mattilsynet har det endelege ordet.

Kyrne blir flytta til eit fjøs på Kaldheim tysdag.

LES OGSÅ: FLYTTAR KYRNE

Publisert mandag 08. februar 2010 kl. 22:14.
Sist oppdatert tirsdag 09. februar 2010 kl. 12:37.