Inger Karin Larsen.
Gler seg til tunnel
Møtelokalet i Skånevik kultur- og idrettshall var heilt fullt då optimisme for tunnel til Etne blei tent på ny i kveld.
– Eg gler meg til å køyra i tunnelen, eg gler meg til å sykla på gangstien frå sentrum til idrettsanlegga og eg gler meg til å gå i miljøgato i Skånevik sentrum, sa styreleiar i tunnelselskapet, Inger Karin Larsen.
Ho oppsummerte tunnelmøtet og konstaterte at tunnelselskapet spelar på lag med både fylkeskommune, kommune og vegvesen.
– At plansjef Torbjørn Aarethun i Hordaland fylkeskommune i kveld har sitert sjefen sin, fylkesrådmannen, på at «Skånevikstunnelen er eit godt fundert prosjekt som bør utgreiast vidare» har gjort meg til optimist, held Larsen fram.
Ho vonar at bygginga kan starta i 2014 og at tunnelen mellom Skånevik og Etne kan stå ferdig to år seinare.
