Hardanger full av vrak?

ODDA: Karane på den kommunale bilverkstaden i Odda på Lindenes har travle dagar. I romjula kom det inn 55 nye bilvrak som skal miljøbehandlast og sendast vidare før vrakmottaket i Odda er heilt avvikla. Det er synd for alle bileigarane i Hardanger og i Kvinnherad.

– Me har hatt ein svær auke i talet på innleverte bilvrak etter Folgefonntunnelen kom. Før den tid tok me imot 200 bilar i året. Nå er talet 450, fortel verksmeister på den kommunale bilverkstaden i Odda, Svein Gunnar Vintertun. Kvinnheradbilistane strøymde til Odda med vrakbilane sine.

Taper pengar

Tenesteleiar VAR-sektoren i Odda kommune, Torstein Backer-Owe, fortel at då staten trekte støtta på 631 kroner per bilvrak frå nyttår, kunne ikkje kommunen halda fram.

– Me måtte leiga den kommunale bilverkstaden med folka der til ordinær timepris. Kommunen tapte pengar før og når staten trekte seg, ville me fått ytterlegare 300.000 i utlegg. Dessutan var kombinasjonen vanleg bilverkstad og oppsamling av bilvrak uheldig, og me har store plassproblem i kommunen.

– Men for folk blir det meir tungvint?

– Ja, det er rett. Folk frå Hardanger og Kvinnherad må no frakta bilvraka sine til Sandeid, Voss eller Stord.

Røldøl trør til

Ove Turtveit i Røldal Bilberging hadde areal og verkstadplass i Tyssedal klar til å starta privat biloppsamling for fem-seks år sidan.

– Men plutseleg skulle heile Tyssedal fredast. Folk protesterte og kommunen fann ut at vår verksemd eigna seg ikkje på dette industriarealet, fortel Turtveit. Sidan den gong droppa han planane.

– Men Røldal Bilberging vil laga til ei ordning der me kan henta bilvrak i Odda, samla opp nokre og kjøra dei til Kaldheims Bildeler i Sandeid.

– Kor dyrt blir dette?

– Me gjer det mot at me får vrakpanten, 1.500 kroner. Det er langt billegare enn om vi skulle frakta ein bil på lastebil. Då ville prisen vera det dobbelte.

Skrot i naturen

Svein Gunnar Vintertun fryktar at den stengte biloppsamlingsplassen vil føra til at fleire bileigarar gir blaffen og berre set bilen ifrå seg i naturen.

– Det kan bli for mykje styr og direkte kostnader å få bilen til eit mottak. For det første kan bilen ikkje slepast utan prøveskilt og den skal vera i forskriftsmessig stand. Elles må ein leiga biltralle til minst 500 kroner. Med kjøring og ferje til Voss eller Stord blir dette reine tapet for hardingar og kvinnheringar.

Torstein Backer-Owe i Odda kommune seier han er fortvila over rotet etter at bilimportørane sitt selskap, Autoretur A/S, overtok ansvaret for å henta inn bilvraka.

– Me får ikkje svar når me skriv til dei, og både SFT og Fylkesmannen er svært unnvikande når me spør kva me skal gjera. Eg meiner Autoretur A/S har eit ansvar for at folk i vårt område får ei rimeleg returordning med innlevering av bilvrak og utbetaling av vrakpant, seier Backer-Owe.

sigmund.hansen[AT]haugesunds-avis.no

"Me vil prøva å gje bileigarane eit tilbod" Ove Turtveit, Røldal Bilberging