Tyskarar lagar fangstdagbok

BØMLO: – Det er berre positivt at me som fisketuristar kan vera med på å sikra framtida for fisken i sjøen. Det er jo i vår interesse også, seier Peter Rost frå Tyskland. Eit pilotprosjekt der fisketuristane langs norskekysten fører fangstdagbok er sparka i gong i år.

Mørketal

Trass i 10-15 års utvikling og vekst i norsk fisketurisme, har eit aukande tal på bedrifter aldri vore pålagt å rapportera fangstane til myndigheitene. Næring og forvaltning har vassa i spekulasjonar og mørkefall.

Havforskningsinstituttet ønskjer å auka kunnskapen om kystfiskeriet gjennom rapportering frå bedrifter som leiger ut båtar til turistfiskarar.

I fjor starta dei så smått med prosjektet "fangstdagbok for turistar". I år er rundt 50 bedrifter med. Sjåneset Rorbuferie ved Langevåg på Bømlo er ein av dei.

– Det er mykje skrik om at tyskarane tek all fisken, no kan me få dokumentert korleis det eigentleg her, seier Georg Lønning.

Turistane positive

Lønning begynte å dela ut skjema til sine turistar i mai. Kvar dag registrerer turistfiskarane fangsten på eit skjema, der dei presiserer kva type fisk dei får. Utleigar har ansvar for å registrera dette i ei fangstdagbok på nettet eller å senda fiskeskjema vidare.

– Det er ingen som har sagt nei, fortel Lønning. Han meiner det er nokon få som øydelegg for andre.

– Du har framleis dei som tar med store fryseboksar og fyller opp, men dei fleste er like interessert i å halda på fiskebestanden som oss, seier han.

Ikkje hamstring

Tyske Peter Rost er ihuga fiskeentusiast og ein av dei som har fått eit skjema i hendene i år.

– Heime i Tyskland må me også fylla ut fangstskjema, fortel han.

Grensa for fisk han kan ta med seg heim er 15 kilo fiskefilet. I tillegg til ein skikkeleg troféfisk.

– Me er ikkje i Norge for å hamstra fisk for å selja heime. Interessa vår er aktiviteten fisking, seier Rost.

I desse dagar er dei innlosjert i Langevåg saman med sonen Maximilian og ein liten kameratgjeng. Mellom formiddagsturen og ettermiddagsturen tar karane seg ein kvil i rorbua, før ny dyst på sjøen.

– Aller helst vil me ha kveite på kroken, seier Rost.

– Den er det mest kamp med, smiler han.