Vil ha omkamp om konsesjon

FITJAR: Ole Vidar Lunde i Midtfjellet Vindkraft AS skildra gårsdagen som ein gledas dag. Måndag kom nemleg klarsignalet frå Noregs Vassdrag- og Energidirektorat om bygging av ein vindmøllepark i Fitjarfjella på 150 MW.

– Midtfjellet Vindkraft har nådd ein milepæl, seier Lunde, som ser fram til å setja i gang arbeidet med finansiering og anbodsrundar. Konsesjonen betyr likevel ikkje byggjestart for prosjektet. Fleire motstandarar har nemleg planar om å anka konsesjonsvedtaket.

Blir anka

– Vedtaket kjem til å bli anka. Siste ordet er ikkje sagt i denne saka, seier Kjell Nesbø i Aksjonsgruppa for Vern om Fitjarfjellet. Nesbø stiller seg sterkt kritisk til sakshandsaminga i NVE, og meiner innvendingar både frå aksjonsgrupper og Fylkesmannen har blitt bagatellisert. No vil aksjonsgruppa invitera til Fitjarbuen til folkemøte i etterkant av konsesjonsløyvet.

– Denne gangen kjem me til å setja i gang ein underskriftskampanje, seier Nesbø, som får støtta frå Noregs Miljøvernforbund.

– Me vil anka, seier zoolog og sakshandsamar i Miljøvernforbundet, Åge Simonsen.

Trua artar

Gruppa reagerer nemleg sterkt på at NVE har gjeve konsesjonar før Miljøverndepartementet sitt forslag til nye retningslinjer for lokalisering av vindturbinanlegg, er på plass. I konsekvensutgreiinga frå NVE blir innverknaden på landskapet vurdert som stor til svært stor, men Miljøvernforbundet vil argumentera med at trua dyre- og planteartar som kongeørn og kystlynghei er observert i området.

– Ifølgje forslaget til retningslinjer frå Miljøverndepartementet vil difor Midtfjellet bli klassifisert som eit område med svært stort konfliktpotensial, forklarer Simonsen. Avdelingsdirektør i NVE, Bjørn Wold, er ikkje overraska over motstanden, men seier at sakshandsaminga har gått etter forskriftene.

Større fordelar

– Departementet har vore veldig tydelege på at konsesjonsbehandlinga skal gå føre seg som normalt, i påvente av dei nye retningslinjene, seier Wold. Han meiner at motargumenta blei nøye vurdert før konsesjonen blei gjeve.

– Men her er fordelane mykje større enn ulempene, seier Wold. Ankefristen for vedtaket er tre veker.

kari.stautland@haugesunds-avis.no

Publisert tirsdag 20. februar 2007 kl. 00:00.
Sist oppdatert tirsdag 20. februar 2007 kl. 08:20.