[KVINNHERINGEN]: Den største dugnaden du og eg kan gjera for fellesskapen i ei tid med aukande smitte, er å legga oss ned på sofaen og halda oss der. I tillegg til at det er mørkt ute, og vêret er tungt og trist – kan det kanskje vera kjærkome med ei oppdatering på serie-fronten.

Kvinnheringen spurde derfor utflytta kvinnhering og kritikar Asbjørn Slettemark om han kunne dela sine beste serietips akkurat no.

Slettemark har dessutan nyleg returnert til Norge etter eit lengre opphald i den tyske hovudstaden Berlin.

– Korleis har det vore å koma heim igjen til Flåklypa?

– Det har heile tida medan vi var i Tyskland vore planen å koma heim igjen i 2020, så det kjennest heilt rett. Det har vore berikande og kjekt å bu i utlandet nokre år, men det er godt å koma heim til komletorsdag og et-debattar om Kurt Nilsen også, melder Slettemark frå tilhaldsstaden i Oslo.

Sidan vi nærmar oss slutten av november drista vi oss òg til å spørja om juleplanane.

– Vi er så heldige at både sambuar Aslaug og eg begge kjem frå Kvinnherad, så det blir lang og flott julefeiring på Husnes og Seimsfoss. Vi reknar med det inneber enorme mengder pinnekjøt begge stader, og at mor mi har fylt opp huset med Sundepølsa og Isrosa. Om svigermor på Seim i tillegg har handla inn røykelaks frå butikken på Nå i Ullensvang kjem eg aldri til å forlata julefrukostbordet, seier Slettemark, som no altså tilrår kvinnheringane følgande seriar i den mørke og truleg våte tida fram mot jul:

Jødisk krigsdrama:

Valley of tears, HBO Nordic

– Valley of tears på HBO Nordic er ein flunkande ny serie om Jom Kippur-krigen (Israel mot Egypt og Syria) i 1973. Med seriar som Fauda, Teheran, Shitsel og fleire er Israel ein av verdas beste produsentar av fjernsynsseriar, og denne er ikkje noko unnatak. Serien følger israelske soldatar under åtak frå syriske soldatar, og viser på intenst vis kvifor den israelske sårbarheita har utvikla seg til konstant militær beredskap, seier Slettemark om den nye israelske storsatsinga.

Sjakk og dop:

The Queens Gambit, Netflix

er noko så utruleg som ein feelgood-serie om sjakk, pillar og livet på ein barneheim. Sjå for deg ein foreldrelaus Magnus Carlsen, berre proppfull av dop og kledd i dei flottaste 60-talskjolane. Der har du hovudpersonen i serien, Beth Harmon. Dette er haustens store sensasjon på seriefronten. For filmnerdar og eldre sjåarar er det kanskje interessant å vita at serien er basert på ein roman frå forfattaren bak Paul Newman-klassikaren «The Hustler» frå 1961.

er noko så utruleg som ein feelgood-serie om sjakk, pillar og livet på ein barneheim. Sjå for deg ein foreldrelaus Magnus Carlsen, berre proppfull av dop og kledd i dei flottaste 60-talskjolane. Der har du hovudpersonen i serien, Beth Harmon. Dette er haustens store sensasjon på seriefronten. For filmnerdar og eldre sjåarar er det kanskje interessant å vita at serien er basert på ein roman frå forfattaren bak Paul Newman-klassikaren «The Hustler» frå 1961.

Rablande galen danske:

Etterforskinga, Viaplay

– Dette er fortellinga om Peter Madsen, den rablande galne oppfinnaren som drap journalisten Kim Wall i ein heimelaga ubåt. Serien gir aldri Peter Madsen merksemd, i staden handlar den om den tunge etterforskinga og det pårørande. Det grepet gjer serien sterk, skånsam og innsiktsfull.

Fleirkulturell NRK-produksjon:

Norsk-ish, NRK

– Norsk-ish på NRK er ein fengande og morosam serie om eit knippe unge vaksne i Oslo. Alle er barn av innvandrarforeldre, og blir dregne mellom foreldra sine tradisjonar og eigne draumar og ambisjonar.

Slaktar NRK-storsatsing, tilrår britisk kongedrama:

The Crown, Netflix

– Gløym det keisame NRK-dramaet Atlantic Crossing! Netflix-serien om dronning Elizabeth IIs regjeringstid er no inne i din fjerde sesong. Det betyr at vi er på 80-talet, og Diana kjem dansande inn på Buckingham Palace. Samstundes regjerer Margaret Thatcher med jernklo, Falklandsøyane blir åstad for krig, IRA sprenger medlemmer av kongefamilien i lufta og prinsesse Margaret byrjar for alvor å merke følgene av tiår med intens røyking og festing. Historisk drama vart ikkje betre enn The Crown, slår han fast.

Filmtips:

Seriøs Borat

– Takk så mykje for serietipsa! Du har ikkje eit filmtips for det meir rastlause publikummet òg?

– Eg likte veldig godt The Trial of the Chicago 7, ein Netflix-film om ei rettssak mot politiske aktivistar på 1970-talet. Filmen er laga av Aaron Sorkin, som i si tid skreiv manusa til TV-serien West Wing/Presidenten. I hovudrolla som Abbie Hoffman finn vi Sacha Baron-Cohen, som mange kjenner som skodespelaren bak Borat. Her visar Baron Cohen kva for ein fabelaktig dramatolkar han også kan vera, rosar Slettemark.

Då er det berre å finna fram fjernkontrollen å streama i veg, til det beste for smittevernet og folkehelsa.

Saken er hentet fra Kvinnheringen.