LANDET RUNDT (Strandbuen): Ni månadar gamle Nala er ein katt litt utanom det vanlege. Ho er litt i tvil om ho er katt eller hund. Ho går gjerne i band på fjellturar og ho liker seg best når ho er ute på motorsykkeltur.

– Eg bur på hybel på Tau og er lærling på Westcontrol, men i helgene reiser eg stort sett heim til foreldra mine på Fister. Eg har ikkje bil eller billappen, berre motorsyklar. Etter at eg fekk Nala i desember i fjor, blei det ofte til at eg køyrde heim til Fister på sykkelen på fredagen, og så måtte foreldra mine ta ein tur frå Fister til Tau og tilbake for å henta katten. Det var ganske upraktisk, fortel Ole August Schläwicke.

Dermed fekk han ideen om å bruka den spesielle kattesekken også når han køyrer motorsykkel.

– Eg var litt usikker første gongen, men det går heilt fint. Eg kjenner Nala, og veit når ho er stressa. Det er ho ikkje når me køyrer motorsykkel. Folk som har køyrd bak oss fortel også at ho ligg heilt roleg og kikkar på dei, seier Schläwicke som både har ein Suzuki 125 kubikk og ein Honda 500 kubikk.

Fjellturar i band. Turar på motorsykkel. Det er berre litt av det Ole August Schläwicke og Nala finn på saman.

Litt som ein hund

Nala har vore med på tur på begge syklane. Ho ligg i sekken og får med seg alt. Det er heilt trygt, så lenge føraren held seg på vegen.

– Eg køyrer ekstra forsiktig når eg veit at Nala er med. Eg vil jo ikkje at noko skal skje då. Alle motorsykkelførarar burde kanskje ha ein katt på ryggen, seier han og smiler.

Nala er oppdratt meir som ein hund enn som ein katt. Ho gjer triks som hundar er meir kjende for – som å sitja, ligga, gå på to og gi labb – og ho går gjerne turar i band.

– Me har mellom anna vore på Preikestolen og Lauvåsen, og på teltturar og campingturar. Då går Nala i band til ho blir trøytt, og så legg ho seg i sekken, fortel Schläwicke.

– Eller oppå sekken. Ho liker seg like godt der, legg han til.

Strandbuen møtte Ole August Schläwicke og Nala midtvegs på turen mellom Tau og Fister på fredag. Dei viste oss nokre triks før dei køyrde vidare.

Crazy Cat Lady

Ifølgje eigaren, så får Nala mykje merksemd. Det har vore inngangen til å bli kjend med mange, og starten på mange samtalar.

– Då me gjekk til Preikestolen, høyrde eg sikkert «sjå, ein katt i band!» minst 50 gonger, seier han.

Det er kollegaene på Westcontrol som synest at bandet mellom Ole August Schläwicke og Nala er så spesielt at det er ei sak for Strandbuen. Schläwicke fortel at kollegaene gjerne mobbar han litt når han snakkar om at han lærer katten nye triks eller går på turar med katten i band.

– Dei kallar meg Crazy Cat Lady, seier han og ler.

Så langt har Nala berre vore med på MC-turar rundt om i nærområdet, men Ole August Schläwicke fekk nyleg lappen på mellomtung MC. Det betyr at han kan køyra lengre turar på Hondaen sin.

– Eg trur ikkje Nala har noko imot å bli med på det, meiner han.

Kattunge forvillet seg inn i et vannrør på Forsand: – I frykt for å drukne kattungen valgte jeg å løfte den fra nakken med munnen

Camilla fann fire veker gamle forlatne kattungar

Skuespiller og oppfinner