ETNE: Ho styrer kjøkkenet og kafeen, han resepsjonen, campinggjester og hytter og utleigerom. Så bur dei i andreetasjen.

Salvador (59) håpar at her kan han få ha arbeid til han pensjonerer seg. Dei kjem frå ein liten landsby nær den meir kjende byen Javea i den spanske Valencia-regionen.

– Her er så vakkert, smiler han.

Og han har alt i nokre år kunna gjera seg van med norsk natur. Han kom for første gong til arbeid i reiselivsbransjen i Norge då han i 2013 fekk arbeid i Stryn. Sidan november i fjor har han jobba på Smeltehuset i Odda – for same firma som står bak Rullestad Camping (Fegna).

No har han fått kona, Nuria, som er kokk, med på laget på Rullestad.

– Ungane våre er så store nå, 22 og 18 år, og dei arbeider heime i Spania og klarer seg, forklarer «Salva» på engelsk.

Nuria vågar seg ikkje utpå med engelsken, men koka norske rettar har ho lært:

– Komla torsdag og søndag, smiler ho.

Ho har middagsmeny kvar dag i kafeen. Og «Salva» seier han er blitt svært så glad i norsk komle med tilbehøyr. Nesten like godt som spansk «Puchero», ein lapskaus med mange ingrediensar som er favoritten frå heimtraktene deira.

Turistar og arbeidsfolk

Det er holdingselskapet Fegna A/S som står for kost og losji på Rullestad Camping. Bak dette selskapet står Tor Petter Stensland, Rune Johan Simonsen og Tom Jøran Johnsen. Dei driv i Etne, Rullestad, Odda og Vågslid. Planane på Rullestad er omfattande.

– Me har sett opp to anleggsriggar med til saman 44 rom. Frå juni er alle romma opptekne av anleggsfolk som skal jobba i inntil halvtanna år med utvidinga av Mowi sitt landbaserte anlegg i Fjæra, fortel Tom Jøran Johnsen.


I tillegg byggjer dei to nye campinghytter, slik at talet kjem opp i seks hytter. Ein stor del av anleggsfolka skal også få servert frukost og middag på campinga.

– Kva med bubilar, camping og turistar?

– Dei har vore velkomne sidan påske. Men me er ikkje heilt ferdige med å klargjera alle områda ennå. Me tek sikte på å leiga bort 12 – 15 faste plassar for heilårscamping. Resten, knappe 60 plassar, blir til bubilar og campingturistar på kortare besøk. Me skal til med oppmerking, ny leikepark og sauna/badstove-hytte ved stranda. Alt skal vera klart til sommarinnrykket, fortel Johnsen.

– Førebels ser det veldig bra ut

Dessutan skal Rullestads gode kjøkken nyttast til å produsera mat også til andre kafear og restaurantar Fegna A/S driv, pluss til catering. Dermed blir det ytterlegare tre til stillingar knytta til verksemda på Rullestad.

– Kor store voner har de for turismen i sommar?

– Førebels ser det veldig bra ut for Odda og me trur også sommarsesongen blir god, sjølv om asiatane ikkje kjem i fullt mon ennå. Det skuldast færre flyruter og dyre flybillettar. Men me trur mange nordmenn framleis vil feriera heime (dels på grunn av høge flyprisar og færre flyruter). Pluss at tyskarar, hollendarar og andre europearar nok er klare for å reisa til Norge att.